لقمان شمس الدين الذي سُجن بسبب “مخالفة” ترميم منزله

layal issa أكتوبر 25, 2021

2 دقائق

هيدا الشاب إسمه لقمان شمس الدين، صرله اكثر من ٢٠ يوم بالحبس لإن كمشوه عم يجدد بيتو ( دهان وبلاط جديد ) كونه عريس جديد، إي نعم.. القوى الأمنية بلبنان ما عاد عندها شغلة ولا عملة إلّا الاستقواء على الناس، وكإن الشعب اللبناني ناقصه ضغط بعد!

للأمانة، البيت معمر بالمشاع من ٣٥ سنة، هو بيت اهلو يعني.. وبدال ما ينقل عليه متل ما هو قال بزبط فيه شوي ليحس انه نقل على بيت جديد، لان ما في مصاري ليشتري بيت .

الموضوع وصل للقاضية إيمان عبدالله، اكيد متوقعين انو تكون قاضية عادلة مش هيك؟؟؟ لاء.. القاضية طلبت انو يكسرو كل التصليحات اللي انعملت ? بحسب رئيس المخفر.. فأهل لقمان ورفقاتو راحو كسّروا بأيديهن البلاط اللي ابنن بق الدم لحتى جابو.. وصوروا فيديو كيف عم يكسرو كل شي، وبعتوه للقاضية.. القاضية بتقول لا ما بيكفي هلقد، لازم الدهان ينشال كمان بالجلخ حتى ما يضل شي!!! انو يا عدالة القاضية انتي جيتي بالواسطة او كيف؟؟؟ لمين تابعة لنعرف لمين نسب؟؟؟ لحزب الله او لحركة أمل؟ لأن ملعون ابوه اللي عملك واسطة تصيري قاضية تتسلطي على رقاب الناس!!!

ما علينا.. الموضوع انتقل من القاضية الظالمة للقاضي علي ابراهيم.. اي اي علي ابراهيم ما غيرو اللي يفترض يكون عم يرجعلنا اموالنا المنهوبة من المصارف ومن الفاسدين .. فبيقترح عدالتو انو يتم تهديم البيت مقابل انو يطلع الرهينة قصدي الموقوف! معقول حدا قال للمدعي العام المالي انو لقمان هو اللي سبب انهيار الليرة او هو اللي محتكر المازوت والبنزين بلبنان!؟؟؟؟
يا عيب الشوم .. المهم انا بطالب بإعدام الشاب لقمان لإنه غشيم.. ليش غشيم؟ لان كان لازم يكون عميل اسرائيلي، او مجرم حرب، او مدير بنك يسرق مصريات العالم ، هيك ما حدا بدق فيه.. صدق اللي قال انو القضاء للضعفاء، كان قاصد انه القضاء ما فيه الا عليهن…